શિન્ઝો આબેના સ્વાગત માટે સાંસ્કૃતિક કાર્યક્રમોની રમઝટ

વિવિધ સ્ટેજ પર અલગ અલગ કલાકારો પોતપોતાના રાજ્યોની સાંસ્કૃતિક કલા રજુ કરશેઃગરબા બનશે આકર્ષણ
By: admin   PUBLISHED: Tue, 12 Sep 2017 23:06:56 +0530 | UPDATED: Fri, 15 Sep 2017 10:53:33 +0530

૨૮ સ્ટેજ પર રજુ કરાશે દેશની સંસ્કૃતિ

આજથી જાપાનના વડાપ્રધાન શિન્ઝો આબે બે દિવસના ગુજરાત પ્રવાસે આવી રહ્યા છે ત્યારે આ ગુજરાત પ્રવાસને ખાસ બનાવવા માટે રાજ્ય સરકાર દ્વારા ભરપૂર તૈયારીઓ કરવામાં આવી રહી છે. ખાસ કરીને અમદાવાદમાં તેમના કાર્યક્રમને ધ્યાનમાં રાખી વિશેષ તૈયારીઓ કરાઈ છે. શિન્ઝો આબે આવતીકાલે બપોરે ગુજરાતની બે દિવસની મુલાકાતે અમદાવાદ પહોંચવાના છે. તેઓ ટોકિયોથી સીધા અમદાવાદ આવી રહ્યા હોવાથી દેશના વડાપ્રધાન નરેન્દ્ર મોદી તેમને એરપોર્ટ પર ઉમળકાભેર આવકારશે. એરપોર્ટથી આ બન્ને મહાનુભાવો ગાંધીઆશ્રમ જશે.

એરપોર્ટથી ગાંધીઆશ્રમ સુધી જાપાનના વડાપ્રધાનના ઉલ્લાસભેર સ્વાગત માટે ૨૮ સ્ટેજ તૈયાર કરવામાં આવ્યા છે. આ ૨૮ સ્ટેજ પર સ્ટેજ દીઠ દેશના વિવિધ રાજ્યના સાંસ્કૃતિક વૈભવની ઝાંખી કરાવતા કાર્યક્રમની રમઝટ બોલાવાશે. આવતીકાલે બપોરે ૩:૩૦ વાગ્યે અમદાવાદ એરપોર્ટ પર ઊતરનારા જાપાનના વડાપ્રધાનની સાથે દેશના વડાપ્રધાન નરેન્દ્ર મોદીનો એરપોર્ટથી ગાંધીઆશ્રમ સુધીનો રોડ શો યોજાશે.

આ રોડ શો અંતર્ગત શિન્ઝો આબે અને મોદી સુરક્ષાના કારણોસર બંધ કારમાં બેસીને રુટ પરના સ્ટેજ પર જે તે ટાઈપનો સાંસ્કૃતિક કાર્યક્રમ રજુ કરનારા અમદાવાદ રહેતા જે તે રાજ્યના કલાકારો તેજમ સ્ટેજ પાસે બન્ને મહાનુભાવોનુ સ્વાગત કરવા ઊભા રહેલા અમદાવાદીઓનુ ભાવભીનુ અભિવાદન ઝીલશે.

દરમિયાન સુભાષબ્રિજથી ગાંધીઆશ્રમ સુધીના રસ્તા પર મ્યુનિસિપલ શાળાની ૧૨૦૦ વિદ્યાર્થીની પરંપરાગત ગુજરાતી વેશભુષામાં ભારત અને જાપાનના ધ્વજ સાથેના કળશ મુકીને શિન્ઝો આબેને આવકારશે. મ્યુનિ. શાળાના ૧૬૦૦ બાળકો અને ખાનગી શાળાના કુલ ૬૦૦ બાળકો મળીને કુલ ૨૪૦૦ બાળકો બન્ને મહાનુભાવોને અમદાવાદની ધરતી પર ભલે પધાર્યા સંબોધશે.

સાબરમતી વિસ્તારમાં ૧૨૦૦ પોલીસ જવાનો તૈનાત કરાયા, ૩૦૦ સીસીટીવી કેમેરાથી સમગ્ર રુટ પર રખાશે બાજનજર : શહેરમાં ૫ હજાર પોલીસ જવાનનો કાફલો, સુરક્ષા વ્યવસ્થા અભેદ બનાવી દેવાઈ

વડાપ્રધાન નરેન્દ્ર મોદી અને જાપાનના વડાપ્રધાન શિન્ઝો આબે આવતીકાલે અમદાવાદના મહેમાન બનવાના છે, જેના પગલે આજે તેઓની સુરક્ષાને લઈ પોલીસ અને જાપાનની સુરક્ષા એજન્સીઓ દ્વારા ગ્રાન્ડ રીહર્સલ કરવામાં આવ્યુ હતું. એરપોર્ટથી લઈને ગાંધીઆશ્રમ, સીદી સૈયદની જાળી, હયાત હોટલ અને સાબરમતી રેલવે ગ્રાઉન્ડ ખાતે પોલીસ દ્વારા તમામ સુરક્ષાની ચકાસણી કરવામાં આવી હતી.

ગૃહમંત્રી પ્રદિપસિંહ જાડેજાએ ગાંધીનગર મહાત્મા મંદિર અને સાબરમતી રેલવે ગ્રાઉન્ડ ખાતે સુરક્ષાની સમીક્ષા કરી હતી. ૩૦૦ જેટલા સીસીટીવી કેમેરાથી બાજનજર રાખવામાં આવશે. તમામ એજન્સીઓ સાથે ગૃહ વિભાગ દ્વારા સંકલન સાધી લેવામાં આવ્યુ છે.

અમદાવાદ એરપોર્ટ અને ગાંધીઆશ્રમ સુધી રોડ શોના પગલે ૧૫૦૦ પોલીસ જવાનોનો કાફલો ખડેપગે રહેશે. રોડ શો યોજવાનો હોવાથી અમદાવાદ ક્રાઈમબ્રાંચ, એસઓજી અને અન્ય પુશિંગ સ્ક્વોડને એરપોર્ટથી ગાંધીઆશ્રમ સુધી તૈનાત કરવામાં આવી છે. ગાંધીઆશ્રમની અંદર ડીસીપી કક્ષાના અધિકારીને બંદોબસ્તની જવાબદારી સોંપવામાં આવી છે. જ્યારે રોડ અને ધાબા પોઈન્ટ પરની જવાબદારી એસીપી કક્ષાના અધિકારીઓને સોંપવામાં આવી છે.

સાબરમતી રેલવે ગ્રાઉન્ડ ખાતે ત્રણ એન્ટ્રી ગેટ બનાવવામાં આવ્યા છે. નરેન્દ્ર મોદી અને જાપાનના પીએમના કાફલા માટે અલગ એન્ટ્રી પોઈન્ટ બનાવવામાં આવ્યા છે. સભાસ્થળથી અડધો કિલોમીટરથી બે કિલોમીટર દૂર વાહન પાકગ આપવામાં આવ્યુ છે. સુરક્ષાને જાતા એરપોર્ટ ખાતે ૩૦૦, ગાંધીઆશ્રમ ખાતે ૬૦૦, હયાત હોટલ ખાતે ૪૦૦, સીદી સૈયદની જાળી અને હોટલ અગાશીએ ખાતે ૬૦૦, સાબરમતી રેલવે ગ્રાઉન્ડ ખાતે ૬૦૦ અએને ગાંધીનગર મહાત્મા મંદિર મળી આશરે ૫૦૦૦ પોલીસ જવાનોનો કાફલો ખડેપગે રહેશે.

મોદી-આબેને પીરસાશે ગુજરાતી વાનગીનો રસથાળ, ભોજનમાં ૧૦૦થી વધુ ગુજરાતી વાનગીઓનો સમાવેશ, મુઠીયા, ઢોકળા, ખમણ, જલેબી, ખાંડવી પણ પીરસાશે, સીદી સૈયદની જાળી ખાતે કરાવશે ફોટો સેશન

જાપાનના વડાપ્રધાન શિન્ઝો આબેના ભરચક કાર્યક્રમોની તૈયારીની સાથે-સાથે તેમના ભોજનનુ મેનુ પણ તૈયાર કરવામાં આવ્યુ છે.  સવારના બ્રેકફાસ્ટ લંચ અને ડીનરના મેનુનુ આગોતરુ આયોજન કરાયુ છે, જેમાં વડાપ્રધાન નરેન્દ્ર મોદીની સાથે જાપાનના વડાપ્રધાન શિન્ઝો આબે આવતીકાલે સાંજે જાપાનીઝ ભોજનની સાથે ગુજરાતી પરંપરાગત ભોજનનો સ્વાદ માણશે. 

આવતીકાલે સાંજે ૬:૪૫ કલાકે આથમણા સુર્યના કિરણો સીદી સૈયદની જાળીમાંથી પસાર થતા હશે ત્યારે ફોટો સેશન પણ કરવામાં આવશે અને ત્યારબાદ સીદી સૈયદની જાળી સ્મારકની સામે આવેલ હોટલ અગાશીએમાં બન્ને મહાનુભાવો ડીનરની મજા માણશે.

અગાશીએમાં યોજાનાર બન્ને વડાપ્રધાનના ભોજનમાં ૧૦૦થી વધુ ગુજરાતી વાનગીઓનો સમાવેશ કરાશે. જેમાં ફજેતો વેજિટેબલ સુપ, જલજીરા લીંબુ, ફુદીના શરબત, પમ્પકીન સુપ, ટોમેટો સુપ, ફરસાણમાં મુઠિયાં, ઈદડાં, ઢોકળા, ખમણ, બટાકાવડા, સેવ-ખમણી, ખાંડવી, કચોરી, કુલેર, દાબડા અને ભજિયા, મઠિયા, હાંડવો ઉપરાંત બાજરીનો રોટલો, મકાઈ, જુવારના મેથીના રોટલા, થેપલા, પુરી, પુડલા, પાનકી, રોટલી, ભાખરી, પંડોળી, બાજરી વડા તેમજ સ્વીટમાં મગની દાળનો શીરો, રવાનો શીરો, દૂધપાક, દૂધીનો હલવો, મગજના લાડુ, ચુરમાના લાડુ, મોહનથાળ, જલેબીનો સમાવેશ થાય છે. સાથે-સાથે જાપાનીઝ વાનગીઓ પણ તૈયાર કરવામાં આવી રહી છે. જાપાનથી સ્પેશિયલ ૨૮ જાતનુ ભોજન શિન્ઝો આબે માટે પેક્ડ મિલ સ્વરુપે આવશે.

આજે અમદાવાદમાં ૫ રુટ પર વાહન વ્યવહાર બંધ રહેશે વાહનચાલકોને પડશે ભારે હાલાકી

આવતીકાલે ભારત અને જાપાનના વડાપ્રધાન અમદાવાદ શહેરની મુલાકાતે આવી રહ્યા છે. આ સંદર્ભે વિવિધ સાંસ્કૃતિક અને અભિવાદન કાર્યક્રમનુ આયોજન કરાયુ છે. આ કાર્યક્રમોમાં ઉમટી પડનાર વિશાળ જનમેદનીને ધ્યાનમાં રાખી અમદાવાદ શહેર ટ્રાફિક પોલીસ દ્વારા પણ ચુસ્ત બંદોબસ્ટ ગોઠવી દેવાયો છે. ટ્રાફિક વિભાગના ૫ એસીપી, ૧૫ પીઆઈ, ૧૫ પીએસઆઈ અને ૧ હજાર ટ્રાફિક જવાનો ટ્રાફિક સંચાલનમાં ખડેપગે રહેશે. તેમજ આવતીકાલે બપોરે ૧ વાગ્યાથી કેટલાક રસ્તાઓ ડાયવર્ટ કરવામાં આવ્યા છે, જેની વિગત નીચે મુજબ છે.

•             બંધ રહેનાર રુટ : શાહિબાગથી ડફનાળા થઈને એરપોર્ટ સુધીનો રસ્તો બંધ રહેશે

•             વૈકલ્પિક રુટ : એસજી હાઈવેથી વૈષ્ણોદેવી સર્કલ-ઝુંડાલ સર્કલ-તપોવન સર્કલ-એપોલો સર્કલ-ઇન્દિરા બ્રીજ થઈને એરપોર્ટ જઈ શકાશે.

                દિલ્હી દરવાજાથી નમસ્તે સર્કલ-રાજસ્થાન હોÂસ્પટલ બ્રીજ-ઘેવર સર્કલ-મેઘાણીનગર-મેમ્કો ચાર રસ્તા-નરોડા પાટીયા-ગેલેક્સી અંડરબ્રીજ થઈને એરપોર્ટ જવાશે

•             બંધ રહેનાર રુટ : ડફનાળાથી રીવરફ્રન્ટ રોડ, રીવરફ્રન્ટ પિકનિક હાઉસ, શીલાલેખ ચાર રસ્તા, સુભાષબ્રિજથી ગાંધીઆશ્રમ અને ચંદ્રભાગા બ્રિજ સુધીનો બન્ને તરફનો રસ્તો બંધ રહેશે

•             વૈકલ્પિક રુટ : દિલ્હી દરવાજાથી દુધેશ્વર રોડ-દધીચી બ્રિજ-જુના વાડજ-રાણીપ એસટી સ્ટેન્ડ-ચીમનભાઈ પટેલ બ્રીજ-સાબરમતી

•             બંધ રહેનાર રુટ : દિલ્હી ચકલાથી ૩ ખુણિયા બગીચા થઈને મિરજાપુર રોડ થઈ વીજળી ઘર સુધીનો બન્ને તરફનો રસ્તો બંધ રહેશે

•             વૈકલ્પિક રુટ : દિલ્હી ચકલાથી પીતળીયા બંબા-ઘીકાંટા રોડનો ઉપયોગ કરી શકાશે

                દિલ્હી ચકલાથી પ્રેમ દરવાજા-કાલુપુર રેલવે સ્ટેશનનો રોડનો ઉપયોગ કરી શકાશે

•             બંધ રહેનાર રુટ : જિલ્લા પંચાયત લાલદરવાજાથી રુપાલી સિનેમા સુધીનો બન્ને તરફનો રસ્તો બંધ રહેશે

•             વૈકલ્પિક રુટ : વિક્ટોરીયા ગાર્ડન-ખમાસા ચાર રસ્તા-ત્રણ દરવાજા-ગાંધીરોડ તરફ જઈ શકાશે

•             બંધ રહેનાર રુટ : નહેરુબ્રીજના પશ્ચિમ ભાગથી રુપાલી સિનેમા તરફનો બન્ને તરફનો રોડ બંધ રહેશે

•             વૈકલ્પિક રુટ : નહેરુબ્રીજ ચાર રસ્તાથી ટાઉનહોલ ચાર રસ્તા-એલીસબ્રિજ થઈ રાયખડ તરફનો રોડ ચાલુ રહેશે

આજે બીઆરટીએસના ૬ રુટ સંપૂર્ણ રીતે બંધ રહેશે ૩ રુટમાં આંશિક રીતે ફેરફાર કરાયા

બે દિવસ ભારત અને જાપાનના વડાપ્રધાન અમદાવાદની મુલાકાતે આવી રહ્યા છે, જેને ધ્યાનમાં રાખીને શહેરના બીઆરટીએસના છ રુટ બંધ કરવાનો નિર્ણય લેવાયો છે, જ્યારે ત્રણ રુટમાં આંશિક ફેરફાર કરવામાં આવ્યા છે. તો પાંચ રુટ રાબેતા મુજબ ચાલુ રહેશે.બીઆરટીએસના આ તમામ રુટ આવતીકાલે બપોરે ૧ વાગ્યાથી  ૧૪ સપ્ટેમ્બર બપોરે ૧ વાગ્યા સુધી અથવા તો સક્ષમ અધિકારી નવી સુચના જાહેર ન કરે ત્યાં સુધી બંધ રહેશે. બંધ રહેનાર રુટોની વિગત નીચે મુજબ છે.

બંધ રહેનાર રુટ

•             ૦૪ - ઝુંડાલ સર્કલથી કોમર્સ છ રસ્તા

•             ૦૩ - આરટીઓથી મણિનગર

•             ૧૨ - આરટીઓથી હાટકેશ્વર

•             ૧૦૧ - આરટીઓ સર્ક્યુલર

•             ૨૦૧ - આરટીઓ એન્ટી સર્ક્યુલર

•             ૧૦૦૦ - એરપોર્ટ શટલ

આંશિક ફેરફાર કરાયેલ રુટ

•             ૦૭ - નરોડાથી ઝુંડાલની જગ્યાએ નારોલથી દુધેશ્વર સુધી ચાલશે

•             ૦૨ - સાયન્સ સીટીથી ઓઢવ રીંગરોડની જગ્યાએ ઓઢર રીંગરોડથી દુધેશ્વર સુધી ચાલશે

•             ૦૯ - સોલા ભાગવતથી મણિનગરની જગ્યાએ મણિનગરથી એલડી સુધીનો રુટ ચાલશે

રાબેતા મુજબ ચાલુ રહેનાર રુટ

•             ૦૧ - મણિનગરથી ઘુમા ગામ

•             ૦૮ - ઈસ્કોનથી નરોડા

•             ૦૫ - વાસણાથી નરોડા

•             ૦૬ - નારોલથી નરોડા

•             ૧૧ - એમજે લાયબ્રેરીથી ઓઢવ રીંગરોડ

જાપાનની ૧૫ કંપનીઓ સાથે રોકાણના એમઓયુ કરાશે ૧૭૫૦ એકર જમીનમાં જાપાની ઈન્ડસ્ટ્રીયલ પાર્ક તૈયાર કરાશે : ટોયટા, સુઝુકી ગુજરાતમાં બેટરી પ્લાન્ટ સ્થાપશે જાપાન ૫ લાખ કરોડથી વધુનુ કરશે રોકાણ

જાપાનના વડાપ્રધાન શિન્ઝો આબે આજથી બે દિવસના ગુજરાત પ્રવાસ પર આવી રહ્યા છે ત્યારે તેમના આ પ્રવાસ સંદર્ભે માહિતી આપતા રાજ્યના મુખ્ય સચિવ જેએન સિંઘે જણાવ્યુ હતું કે, આવતીકાલે બપોરે ૩:૩૦ કલાકે જાપાનના વડાપ્રધાન પોતાની પત્ની અને પ્રતિનિધિમંડળ સાથે અમદાવાદ એરપોર્ટ આવી પહોંચશે, જ્યાં તેમનુ ગ્રાન્ડ વેલકમ કરવામાં આવશે. જાપાનના વડાપ્રધાન સાથે ભારતના વડાપ્રધાન મોદી એરપોર્ટથી ગાંધીઆશ્રમ સુધી ૮ કિલોમીટરનો રોડ શો યોજશે.

જેએન સિંઘે જણાવ્યુ હતું કે, બન્ને દેશના વડાપ્રધાનની હાજરીમાં જાપાનની ૧૫ કંપનીઓ સાથે ગુજરાતમાં મૂડીરોકાણ સંબંધિત એમઓયુ પર હસ્તાક્ષર કરવામાં આવશે. એટલુ જ નહીં  ભારત-જાપાનની બિઝનેસ ફોરમની બેઠકમાં સુઝુકી, ટોયટા જેવી ટોચની જાપાની કંપનીઓના પ્રતિનિધિઓ પણ હાજર રહેશે. તેમણે જણાવ્યુ હતું કે, સુઝુકી અને ટોયટા કંપની ગુજરાતમાં મોટાપાયે બેટરી ઉત્પાદનના પ્લાન્ટ શરૂ કરશે.  તેમણે જણાવ્યુ હતું કે જાપાનની મદદથી ગુજરાતમાં આકાર પામી રહેલ બુલેટ ટ્રેન પ્રોજેક્ટના કારણે ગુજરાતમાં ૨૦ હજાર યુવકોને રોજગારી મળશે. 

આ બુલેટ ટ્રેન માટે ખાસ તાલીમબદ્ધ યુવકો તૈયાર કરવા વડોદરા ખાતે રેલવે ટ્રેનિંગ અને Âસ્કલ ડેવલોપમેન્ટ યુનિવર્સિટી શરુ કરાશે.  જ્યાં દર વર્ષે ૧ હજાર યુવકોને બુલેટ ટ્રેન સંદર્ભે તાલીમ અપાશે. એટલુ જ નહીં ગુજરાતમાં ૧૭૫૦ એકર જમીનમાં જાપાન ઈન્ડસ્ટ્રીયલ પાર્ક સ્થાપવામાં આવશે, જેમાં મોટાપાયે જાપાનની કંપનીઓ રોકાણ કરશે. વડાપ્રધાન મોદી દ્વારા આવતીકાલે રાત્રે જાપાનના વડાપ્રધાન શિન્ઝો આબેના માનમાં ડિનર કાર્યક્રમનુ આયોજન કરવામાં આવ્યુ છે, જેમાં હાજર રહેવા ૧૦૦થી વધુ મહેમાનોને આમંત્રણ આપવામાં આવ્યુ છે.

અમદાવાદની કોર્ટ બે દિવસ સમન્સ કે વોરન્ટ જાહેર નહીં કરે

આજથી બે દિવસ સુધી અમદાવાદ પોલીસ સુરક્ષા બંદોબસ્તમાં વ્યસ્ત છે. તેમજ ઉચ્ચ અધિકારીઓથી લઈને વહિવટી તંત્ર પણ વડાપ્રધાન નરેન્દ્ર મોદી અને જાપાનના વડાપ્રધાન શિન્ઝો આબેની આગતા સ્વાગતામાં લાગેલ છે, જેને ધ્યાનમાં રાખી અમદાવાદ જિલ્લાની વિવિધ કોર્ટો દ્વારા એક મહત્વનો નિર્ણય લેવાયો છે. જે મુજબ, અમદાવાદની તમામ કોર્ટ આજથી બે દિવસ સુધી કોઈ વોરન્ટ કે સમન્સ ઈશ્યુ નહીં કરે. 

સુત્રો તરફથી મળતી માહિતી મુજબ પોલીસ તંત્ર અને વહિવટી તંત્રની વ્યસ્તતાના કારણે પોલીસ અત્યારે વોરન્ટ કે સમન્સ બજાવી શકે તેમ નથી. પોલીસ વિભાગ અને વહિવટી તંત્રની આ સ્થિતિને ધ્યાનમાં રાખી કોર્ટ દ્વારા આ નિર્ણય કરાયો છે. આજે વિવિધ કોર્ટના ચીફ જસ્ટીસની મહત્વપૂર્ણ બેઠક મળી હતી. જેમાં સર્વ સંમતિથી આ નિર્ણય કરવામાં આવ્યો હતો.  જેનાથી પોલીસ અને વહિવટી તંત્રને મોટી રાહત થઈ છે.

Post Your Comment

Your Comments

Online Poll

શંકરસિંહ વાઘેલાએ કોંગ્રેસ છોડ્યાં પછી આવનાર ઇલેક્શનમાં કોંગ્રેસ પર આની મોટી અસર પડશે?

Yes
No

Copyright © 2017 News of Gujarat | Design & Developed By Seawind Solution Pvt. Ltd.