કોંગ્રેસ પાર્ટીને ફરી બેઠી કરવાનો રાહુલ ગાંધી સામે રહેશે સૌથી મોટો પડકાર : પાર્ટીનુ નવુ નેતૃત્વ તૈયાર કરવુ પણ રાહુલ માટે અનિવાર્ય

અધ્યક્ષ બન્યાના એક દિવસ પહેલા જ રાહુલની અગ્નિ પરીક્ષા
By: admin   PUBLISHED: Mon, 04 Dec 2017 11:26:58 +0530 | UPDATED: Tue, 05 Dec 2017 01:38:24 +0530

ગુજરાત ચુંટણીના પરિણામ નક્કી કરશે રાહુલનુ ભવિષ્ય

૧૩૨ વર્ષ જુની કોંગ્રેસ પાર્ટીમાં નવા યુગની શરૂઆત થઈ રહી છે. આજે રાહુલ ગાંધીએ પાર્ટીના અધ્યક્ષ પદ માટે પોતાની ઉમેદવારી નોંધાવી છે. જો કોેઈ સામે ફોર્મ નહીં ભરે તો ૧૧ ડિસેમ્બરે રાહુલ ગાંધીને અધ્યક્ષ જાહેર કરી દેવામાં આવશે અને ચુંટણી થવાની સ્થિતિમાં પણ ૧૯ ડિસેમ્બર સુધી એ નક્કી થઈ જશે કે કોંગ્રેસના નવા અધ્યક્ષ કોણ હશે. જોકે ચુંટણી થાય તેવી શક્યતા છે જ નહીં. સોનિયા ગાંધીના પુત્ર રાહુલ ગાંધીનું પોતાની માનો વારસો સંભાળવાનુ નક્કી છે.

સોનિયા ગાંધીએ ૧૯૯૮માં ડુબતી કોંગ્રેસની નાવ સંભાળી હતી. તેમણે પાર્ટીને ફરી સત્તા પર લાવી અને લગભગ ૧૯ વર્ષ સુધી પાર્ટીના અધ્યક્ષ પદ પર રહ્યા. ૨૦૦૪માં લોકસભાની ચુંટણીના પરિણામોએ તમામને ચોંકાવી દીધા હતા, કારણકે ત્યારે સમગ્ર દેશમાં વાજપેયીનો દબદબો હતો અને ભાજપના ઈન્ડિયા સાઈનિંગ નારાની બોલબાલા હતી. તેમ છતાં સોનિયા ગાંધીએ સત્તા મેળવવામાં સફળતા મેળવી હતી. ત્યારબાદ ૨૦૦૯માં ફરી સત્તામાં વાપસી કરાવડાવી. જોકે, ૨૦૧૪માં કોંગ્રેસે કારમી હારનો સામનો કરવો પડ્યો. ત્યારથી જ સોનિયા ગાંધીના રાજીનામાની અટકળો ચાલી રહી હતી. ત્યારે હવે રાહુલ ગાંધી પાર્ટીની કમાન સંભાળવા જઈ રહ્યા છે. ત્યારે રાહુલ ગાંધી સામે અનેક પડકારો ઉભા છે.

આમ પણ કોંગ્રેસ પાર્ટીમાં નહેરુ ગાંધી પરિવારના વંશજોને પડકાર ફેંકવો મુશ્કેલ છે. રાહુલ ગાંધી ૨૦૦૪માં પ્રથમ વખત અમેઠીથી લોકસભાની ચુંટણી જીત્યા હતા. આ સીટ ૧૯૬૭માં બનાવવામાં આવી હતી. ત્યારથી લઈને આજ દિવસ સુધી કોંગ્રેસની રીઝર્વ સીટ રહી છે. ૨૦૦૪માં રાહુલ ગાંધીને અમેઠીમાં ૬૬ ટકા વોટ મળ્યા હતા. જ્યારે ૨૦૦૯માં ૭૨ ટકા વોટ મળ્યા હતા. જ્યારે ૨૦૧૪માં તેમની જીત તો થઈ હતી પરંતુ વોટનો આંકડો ૪૭ ટકા પર આવી ગયો હતો.

 અધ્યક્ષ બનતાની સાથે જ રાહુલ ગાંધીની અસલી અગ્નિ પરીક્ષા ગુજરાત ચંુટણીમાં થનાર છે. સત્તાવાર રીતે તેમને અધ્યક્ષ જાહેર કરવામાં આવે તેના ગણતરીના દિવસોમાં ગુજરાત ચુંટણીના પરિણામ જાહેર થવાના છે.  આ ચુંટણીના પરિણામો નક્કી કરશે કે રાહુલ ગાંધી કોંગ્રેસને કઈ દિશામાં લઈ જઈ શકે તેમ છે. રાહુલ ગાંધી પર ત્યારબાદ પણ અનેક પડકાર રહેલો છે. સૌથી મોટો પડકાર પાર્ટીને ફરી બેઠી કરવાનો છે.

લોકસભામાં અત્યારે પાર્ટીના સાંસદોની સંખ્યા માત્ર ૪૪ છે. તેમજ દેશમાં કોંગ્રેસ વિરોધી લોકવલણ પણ જોેવા મળી રહ્યુ છે. ત્યારે લોકોના મનમાં પાર્ટી માટે ફરી વિશ્વાસ ઉભો કરવો એ રાહુલ ગાંધી માટે સૌથી મોટો પડકાર રહેશે. જ્યારે બીજો મોટો પડકાર પાર્ટીનું નવુ નેતૃત્વ તૈયાર કરવાનો છે. સોનિયા ગાંધીની આગેવાનીમાં અત્યાર સુધી જે નેતાઓ કોંગ્રેસને ચલાવતા હતા તેમાંથી મોટાભાગના હવે નિવૃત્તિની વય મર્યાદા પર પહોંચી ચુક્યા છે. આવી સ્થિતિમાં નવુ નેતૃત્વ તૈયાર કરવુ રાહુલ ગાંધી માટે સૌથી મોટો પડકાર છે.  રાહુલે પહેલા જ સંકેત આપ્યા છે કે તે પોતાની ટીમમાં સચિન પાયલટ, જ્યોતિરાદિત્ય સિંધીયા જેવા યુવા ચહેરાઓને મહત્વનુ પદ આપી શકે છે. ત્યારે રાહુલ આ પડકારમાં સફળ થશે કે નહીં તે સમય કહેશે.

Post Your Comment

Your Comments

Online Poll

શું તમને લાગે છે કે હાર્દિક પટેલની રેલી-સભાઓને નરેન્દ્ર મોદી કરતાં વધુ પ્રતિસાદ મળી રહ્યો છે?

Yes
No

Copyright © 2017 News of Gujarat | Design & Developed By Seawind Solution Pvt. Ltd.